第十章：走上IVF的路 植入DAY 3 胚胎

4月21日　（取卵後 day 3）


今天要植入胚胎，我有4粒受精卵，我估應該會植入最好的2粒（純粹靠估，最後決定以醫師為準）

一去到北醫就去抽血先，跟住返上生殖中心等照超聲波，以確定植入的位置，今天的內膜有1.79


　　　　　　　　　我的4個寶貝：

今日只會植入2粒胚胎，雪2粒

因為我後生，醫師話植入4粒好容易有多胞胎，要減胎時會好傷心的

今日有問到寶醫師，點解我取得6粒卵

我發覺台灣人好鍾意打比喻，醫師話一班學生一定會有啲係成績好，有啲成績差，唔會全部都考第一

以我理解，就係我的卵子質素唔平均，或者，可能質素唔係咁好

植入過程好快，5分鐘內完成，休息15分鐘之後可以走得，仲有收到寶派成員的好孕糖

我植入的兩個day 3胚胎係7G3 和 6G3

7G3即是有7個細胞 grade 3，沒有碎片 （北醫將grading分為1、2、3）

等級算是中等

植入計day 3，抽血驗 b-hcg 的日子係 day 14，如果結果係有懷孕，day 16要再驗多一次，睇下有冇多過1.66倍升覆

開獎的的日子係5月2 日

第九章：走上IVF的路 Day 0 取卵

4月18日 （day 12；取卵 day 0）

今日預約左5pm取卵，要靜脈麻醉，10小時之前開始唔可以食野和飲水，所以7am之前以要食完早餐

老公要2pm前將精子交去生殖中心，我地交低左精之後就喺北醫等，因為我朝早只係食左個米粉，到中午已經好肚餓，所以唔想周圍走

4pm 去到產房報到，姑娘問左少少資料，跟住換衫等入手術室

姑娘帶我入手術室前，俾左張好暖的氈我，因為手術室裡面都幾凍

自從上次麻醉之後，今次唔會咁驚喇，只要聽姑娘講用力吸氣就會好快訓著

今日係唔會見到寶醫師，取完卵之後我會被推會去休息室，訓多一陣姑娘叫醒我，5:45pm，麻醉前4:45pm，我諗取卵應該5-10分鐘完成

因為係靜脈麻醉，恢復會好快，6:15pm已經離開休息室，不過生殖中心已經關門，問唔到取卵數目，今日又係星期六，要星期一先可以打去問

姑娘交代左要11pm先可以食野，但係我真係等唔到喇，離開北醫20分鐘之後已經買左個包食，跟住就去食晚餐，仲要食埋甜品

取卵之後下腹有啲痛，唔可以太大動作，第二日起身已經唔痛

　每日的用藥：

～～～～～～～～～～～～～～～～～～～～～～～～～～～

4月20日 （取卵 day 2）

10am打去生殖中心問取卵和受精情況，結果係取卵6粒，受精4粒，安排了4月21日植入，早上10點報到

好唔開心，明明話好多，跟住話9粒，最後得4粒？？？！！！點解會咁架？？？

老公都有安慰我，話貴精不貴多

唯有希望佢地真係全部都係精英啦

第八章：走上IVF的路 DAY 10 覆診

4月16日（Day 10）

8:30am去到北醫驗血LH、P4、E2，之後上去5樓報到，跟住又係等。。。

直到珮宜姐叫我個名去照超聲波，佢話左邊比右多卵，但係total唔係我想像中咁多，記得上次醫師話我可以取好多卵，我諗超過10粒先算係多，直係好失望呀！！

入到去寶醫師診症室。。。醫師話應話可以取到9粒，內膜也很好，今日打多一次排卵針作最後衝刺，希望再谷大啲卵，另外，要加多一支Cetrotide（抑制排卵針），明天6:00am要打破卵針

取卵日子安排在4月18日，植入日係4月21日，醫師在當日晚上就要出國，好彩趕得到在醫師出國前植入，如果唔係就另一位醫師代理

今次有要求醫師俾我影低超聲波相，其實係想睇下卵子有幾大

睇完相先知啲卵大得唔平均

右：1.92 / 1.5 / 1.42 / 1.03 / 0.79

左：1.9 / 1.63 / 1.56 / 1.42 / 1.35 / 1.07 / 1.02

內膜：1.5cm

上網揾左啲資料，ivf取時，卵子最好大過1.8，而我個啲好明顯大得唔一致，當初寶醫師話可以取好多卵，今日話俾我知得9粒，真係一啲都唔算多，我懷疑係我對排卵針Merional的反應唔好，而寶醫師又想喺佢出國之前幫我取卵，所以只有今日可以最後衝刺，希望啲卵真係可以快快長大啦～～

我發覺當我對住醫生時，有好多一早諗左嘅問題都係唔記得問，同埋我又係第一次ivf，所以好多野都唔知，醫生話乜，我就答好、好、好，希望下次見醫生時我唔會好似食左懵仔藥咁

兩天後4月18日取卵

第七章：走上IVF的路 Day 3 覆診

4月8日（day 2）

搭早機去台北，落機後即刻去聯合驗血

今次除左驗8大血液之外，也要驗Free t3、 Free t4、ATA 、ANTI-TPO

上午11:00抽血，下午3點幾已經有報告，ATA 和 ANTI-TPO都係“紅字”，即是唔合

格？？？！！！見到有紅字，心都跳埋出黎

聯合的ATA 和 ANTI-TPO 的標準值係<60，我ATA=69，ANTI-TPO=1284

即刻上寶派問，估唔到第一個回覆嘅係寶醫師，佢話：relax , count on me

我都有google 一下究竟ATA 和ANTI-TPO係乜，不過search完都唔係太清楚，只係知道係同甲狀線有關的抗體。。。算啦，聽日都會見醫師，睇下醫師點講仲好，自己係咁上網睇會痴線的

～～～～～～～～～～～～～～～～～～～～～～～～～～～

4月9日（day 3）

8:30AM上到5樓生殖中心，首先要簽到，一定要同姑娘講你到左，跟住佢就幫你排超聲波，5樓超聲波唔係醫師親自照的，係姑娘（珮宜姐）照的，不過，可以放心，佢好專業的

跟住就係一段等待的時間。。。

除非係頭一、兩個登記，如果唔係就要預左整個睇症過程要2-3小時，5樓每日都好多人，星期六就更加

等左大約45分鐘，到我照超聲波

珮宜姐說我可以取很多卵，睇得出是年青的卵巢，聽到之後好開心！！

超聲波後，又係一段等待的時間。。。

等左一陣，聽到寶醫師叫我個名，可以入診室

寶醫師睇完我個驗血報告和超聲波相就話：很好，可以上療程，你可以取很多卵

關於ATA 和ANTI-TPO唔合格，佢話：這個不影響受孕，但是怕生出來的孩子會有智力問題，一定要食藥直到生，不用擔心

原來唔影響受孕，咁我都冇咁驚

跟住就寫藥單和安排我下次覆診的時間

攞左藥單之後要去地下俾錢和攞藥，之後就要返上去學打針


   排卵藥和針（一次份量）：

　

　D3-D9要打的針：

我用的排卵針係Merional，D3-D6打225iu，D7-D9打150iu+半支Cetrotide (抑制排卵針)，打Cetrotide的作用就係防止卵子會提早排出來

講番學打針，第一針都係我自己打，勁！！！

原先係諗住老公幫我打的，因為我怕落唔到手，啲人又話會打到瘀晒，又話痛，又點點點。。。所以我就同姑娘講老公學就得喇，我怕怕，跟住我問姑娘，要同一時間打嗎？她說最好是，當時係下午１點，正係返工時間呀，即是我老公打唔到啦。。。好。。。我自己打

我同姑娘講：今次都是我自己打，你看著我就好了（突然覺得自己好勇敢）

攞住支針對住個肚10秒，都未敢打，老公話：快啲啦，一野拮落去

跟住我就好快、恨、準。。。oh...打完

個針頭好幼和短，所以一啲都唔痛，可以話係冇感覺

老公係咁問我痛唔痛，我話唔覺，只係有少少m痛（mc d3）

入針的位置大約要打肚臍下兩隻手指和左右兩隻手指的地方，坐低屈少少腰會擠到啲肉，會容易啲打


今日行程完結，留係北醫時間：0830-1330

下次覆診係4月16日

第六章：第一次見寶醫師

1月21日，day 14

預約左9：50見寶醫師，因為第一次去北醫看診要先喺地下報到，填個人資料、度高、磅重、量血壓等，所以我都早左半個鐘到

跟住就可以上2樓婦科門診，直接去寶醫師門口度叩門，同姑娘講到左就ok，可以喺出面等

雖然係登記左，但係都要等

本身老公同我一齊等㗎，不過酒店夠鐘check out，佢要去check out，得番我自己等······

等左個幾鐘，終於可以入去見寶醫師

我同佢講左我嘅問題，想做ivf，佢睇左我day 13的驗血報告就話：你快要排卵囉，很好！！   跟住問我：是不是要直接ivf，不考慮iui，我說不想浪費時間，直接ivf吧

之後就返出去等照陰超

去到超聲波房，都唔係好緊張，因為在香港都有照過，醫生都話冇問題，點知......寶醫師話我的子宮不太好，我即刻“吓”左一聲，O咀嘴！！

寶醫師：有息肉，在子宮內膜

我：在香港的醫生說我子宮沒問題

寶醫師：我們這台機是最新的...白色的這顆是息肉...你要先把息肉除掉，不然，有卵都沒用，可以先在香港動手術

我（思緒混亂中）：哦

然後照卵巢

寶醫師：1，2，3，4，5，6...

我心諗，有咁多卵咩？！

寶醫師：你有吃排卵藥嗎？

我：第一次食，一天一顆

寶醫師：你有三顆要排

照陰超過程好快，可以話係快而準，醫院啲設備真係唔同診所，新好多，唉...令我對香港啲婦科診所冇乜信心！！

照完後又要返出去等叫名入診室

寶醫師：你先在香港做完手術再過來吧

我：可以在這裡做嗎？

寶醫師：可以，（然後叫他的助手姑娘拿schedule看）下星期二可以，可以安排最早給你，8點鐘，你之前一天過來台北

就係咁，我就喺北醫做左子宮鏡，過程要全麻

粒粒馬蹄。馬蹄糕

呢個粒粒馬蹄糕用左好多馬蹄，好清甜

過年時食左好濃味的蘿蔔糕和芋頭糕，再食番一件清甜的馬蹄糕，真係正！！

份量：三斤圓形盤

材料：

馬蹄          一斤半去皮

馬蹄粉      250g

片糖          4塊半 (太古蜂蜜片糖)

水              3碗半              

馬蹄最好自己刨

第五章：初診寶醫師前的準備

去北醫初診前可以在網上預約，外國人可以用passport登記，只要在passport number前加@就可以了，真係好方便

寶醫師(BEC)的粉絲們成立了“寶派”，係一個forum，可以俾我地交流資訊、有啲好有經驗的姊們解答問題、仲可以同寶醫師私訊

BEC好快回覆，雖然答案非常簡短，但係一定係重點！！　

BEC每日都見好多病人，居然會自己覆訊息，真係好有心！！

第四章：決定到台北ivf

自從知道右邊輸卵管塞了之後已經決定要做ivf

身邊的朋友都問我點解唔試下先通輸卵管，同埋我咁後生，應該唔使去到呢一步

其實，通完之後都唔係包生仔架，輸卵管有機會塞番，亦有可能唔識郁，即是不能運送受精卵到子宮而令到宮外孕

我同老公都鐘意小朋友，所以佢都支持我去做ivf

在BK有好多成功的台灣ivf分享，佢地有啲係因為在香港ivf失敗了，就去台灣，當然，有成功和失敗。成功與否係取決預卵子和精子質素，所越後生的成功機會一定會大啲。爬左好多文之後，我決定了北醫的陳啟煌醫師（寶醫師）

我在一月去台北旅行時順便去寶醫師度初診，準備4開始療程

第三章：右邊輸管塞了後，見婦科醫生

我照輸卵管唔係醫生寫紙俾我去照，係我自己去化驗所照的

知道結果後就book左婦科醫生胡廣森(我阿姨介紹的)，主要想聽下醫生有咩建議，十一月頭打去book，要等到十二月中先有得睇

～～～～～～～～～～～～～～～～～～～～～～～～～～～

喺呢個時候，我就開始睇我的第四個中醫，譚萬信，佢喺廣華要好早預約，所以我就去黃大仙醫院，早上睇，唔使等好耐

譚醫師話排卵出血係內分泌的問題，一定要調理

問佢要調理幾耐，佢話人人唔同，有啲人幾個cycle，有啲人可能要1年，聽到之後好驚呀！！已經等左1年，仲要等幾耐？！

好彩我同譚醫師都幾夾，第1個cycle排卵時有少少血，第2個cycle已經冇血，呢個困擾左我好多年的問題終於解決了！！就算今個cycle冇食中藥，都冇血。。。

～～～～～～～～～～～～～～～～～～～～～～～～～～～

好喇。。。講番我睇婦科醫生胡廣森

馬年最後一個工作天

今日馬年最後一天工作，收爐了...yeah!!

又開始了我的2星期unpaid leave^^


今日工作的搞笑事件：阿總話 First choice is chicken hot wrap & second choice is 'NOT EATING'

第二章：照輸卵管

2014年10月尾，day 10的一天，約左照輸管，之前在BK見到有啲jm話如果輸卵管真係塞左的話，打顯影劑時會好痛，似10級m痛，要食定止痛藥，仲有機會暈暈暈，嘩...好恐怖咁！！不過我唔驚，為左生仔，我什麼都敢做！！

為安全起見（誇張haha...），我叫左媽咪陪我一齊去，佢喺出面等我

入到去換好衫後要訓喺張鐡床上面，冷冷的，姑娘主動俾左張暖毯我，準備好工具後，醫生就入黎喇，醫生好nice的...

首先用鴨嘴拑將陰道張開（唔痛），跟住就放工具，至於係咩工具我睇唔到，不過係有少少痛，跟住醫生就話陣間會打顯影劑，可能會有啲肚脹脹，影幾張相就ok

打顯影劑時完全冇感覺，真的...跟住轉右邊先，等顯影劑可以快啲溜入輸卵管，我喺個mon度見到顯影劑在子宮內，不過...右邊輸卵管好似見唔到有色，我諗，可能輸卵管太幼，我睇唔到啫，跟住到左邊，呢邊我見到有條好幼的線，也聽到醫生同姑娘講：呢邊好靚...

影完左邊之後，醫生出返去

我問姑娘：醫生只係話左邊好靚，係咪即是右邊塞左？

姑娘：佢話左邊靚，唔代表右邊塞左嘅

其實我自己心裡有數，雖然我唔係專業，但真係見唔到右邊條線囉！！

其實成個過程好快，大約20分鐘，照完之後都冇流血，不過要用護墊，以防萬一

報告3日後出了，我一早有心理準備右邊可能塞了

結果，左邊暢通，右邊塞了

知道結果後，都冇咩好驚，因為我連最後一步ivf都預備左，已經諗好晒後路

第一章：原來生仔真係唔易

我同老公一路都諗住生bb，結婚一年之後就積極造人，原本以為好易，點知...到而家...已經try左1年3個月，都未有...

不嬲m都好準時，有m痛，不嬲都有做婦科檢查，每次照完陰超都話子宮冇問題，內膜也ok，子宮有少少後屈，講真...冇肌瘤都已經好安心了！！

頭幾個月有用排卵紙和量體温，搞到好緊張，見到紅啲有深粗就捉老公dodo，真係好似交功課咁，有次仲緊張到哭。我每個月都有深粗，大約d13-16排，排卵時會有啲痛，所以好清楚幾時排，排後體温又會升，呢個排卵紙和量體温的方法，我月左4個月就STOP。

因為有m痛和排卵出血，所以一開始就有睇中醫調理

第一個中醫，次次都話我濕，啲中藥食到我...唉...疴到七彩，睇左2個月就冇再睇

第二個中醫，出名睇婦科。m痛有改善，不過排卵出血都係冇咩好轉，醫師話針炙可以幫助排卵，咁我又試下啦...4個月過去喇，都係未懷上，下巴仲出左好多痘痘，一向好愛靚的我，見到自己個樣好唔開心>-<。我個中醫話我出痘痘應該唔關佢啲中藥事，叫我飲多啲水，食得清啲。我唔係唔信佢，不過都有上網揾下巴出痘痘的原因：內分泌有問題，咁...即是關卵巢事啦...跟住我就冇再睇呢個中醫

跟住，我就睇平時媽咪睇開的中醫（唔係出名婦科的），諗住先改善痘痘，醫師話幫助懷孕的藥會令子宮血液行得快，我受唔到就會出痘痘，一個星期之後，下巴啲痘痘就冇再出，中醫其實中醫真係人夾人～～

2014年10月，時間真係過得好快，就咁樣試試下（好努力mode），11個月了！！仲係冇消息...好灰...懷疑自己...不育？！卵巢早衰？！   oh...no...仲有2個月先夠31歲，（ps 老公同我同年，的精子係正常的）

開始睇iui和ivf 的資料，BK的jm們分享好多好多。香港的私家ivf很貴，政府的又要等好耐，而家有好多人都去台灣ivf，睇左好多jm們的分享，心中已經選定幾個台北醫師：劉志鴻，翁紹平，陳啟煌（寶醫師）。

老公叫我唔好咁緊張，試下放鬆啲可能會成功呢～～

老實講，身邊啲朋友真係好易有

我地好緊張又試過，好relax又試過，都唔得，一定係身體出現左什麼問題！！

所以我第一步就book左照輸卵管，如果輸卵管塞了，精子和卵子係唔會相遇，即是冇可能會懷孕，下一篇會講下照輸卵管